Monday, October 30, 2017

NEOMANILA (2017, QCinema)


Matapos ang mga dekalidad na Filipino political crime thriller movies tulad ng "Engkwentro" (2009), "On the Job" (2013), "10 000 Hours" (2013) at Respeto (2017), narito naman ang pelikulang "Neomanila" na kabilang sa Circle Competition ng QCinema 2017.

Magiging entry ng Pilipinas sa darating na Academy Awards o Oscars for Best Foreign Language Film ang isa sa pelikula ni Mikhail Red ngayong taon ang "Birdshot"' na ipinalabas kamakailan lamang sa Pista ng Pelikulang Pilipino. Back-to-back o consecutive din ang pagtalakay niya sa mga sociopolitical crime thriller. 

Si Toto (Timothy Castillo) ay isang ulilang teenager na ginagawa ang lahat upang makalabas ang kuya Kiko (Ross Pesigan) niya sa kulungan dahil sa droga. Kahit nag-drodroga ang kanyang kapatid ay hindi niya bisyo ito. Samantala, kabi-kabila ang mga extrajudicial killings sa bansa at isa sa mga hitwoman nito ay si Irma (Eula Valdes). Naawa si Irma kay Toto dahil ulila na ito, siya pa ang gumagawa ng paraan para mailabas sa kulungan ang kanyang kuya, ginugulo siya ni Dugo (Jess Mendoza) at kaibigan ni Irma ang nanay ni Toto. Kaya naman kinupkop ni Irma si Toto. Katuwang ni Irma si Raul (Rocky Salumbides) sa raket nila tuwing tumatawag si Sarge. Isinama nila Irma at Raul si Toto sa operasyon sa pagpatay sa mga target. Ngunit saan dadalhin ang pagiging motherly ni Irma kung sa huli ang target nila ay isang taong matagal na niyang hinahanap.

Maihahalintulad ang karakter ni Eula Valdes na si Irma sa karakter ni Gena Rowlands sa pelikulang "Gloria" (1980). World hardened woman sila pareho at kinakitaan ng pagiging motherly sa mga batang karakter. Ang kaibahan lang ay may twist si Irma bago matapos ang pelikula. Ayokong maging spoiler sa twist. Isa ito sa hindi malilimutang role at performance ni Eula Valdez. Hindi ako magtataka na manominado siya sa iba't ibang award giving bodies at manalo pa siya. 

Ang on-at-off-screen partnership nila Rocky Salumbides at Eula Valdes ay nakatulong sa kanilang chemistry. Menacing naman ang portrayal ni Jess Mendoza bilang Dugo. Si Dugo ang lider ng mga kabataang lulong sa droga. Mahusay na nagampanan ni Timothy Castillo ang kanyang role bilang Toto. Hindi masasabing inosente ang teenager sa mundong ginagalawan pero may mga bagay na kahit siya sa bandang huli ay hindi niya inaasahang mangyayari. Kahit maikli ang kanyang paglabas sa pelikula ay scene stealer ang pagganap ni Angeli Bayani bilang Irene Reyes, isa sa mga pakay ng tandem nila Irma at Raul.

Mahusay ang screenplay ng direktor Mikhail Red katuwang sina Rae Red at Zig Dulay. Magaling ang execution ni Mikhail Red sa pagdirek ng pelikula. Mapapansin na magaling ang paggamit ng ilaw sa pelikula. Mala-Wong Kar Wai-sh ang datingan sa pelikula.

"Biktima, suspek, pareho lang yan!", ito ang paalala ni Raul kay Toto na mag-iiwan ng marka sa manonood. 

Matagumpay na nailahad ng filmmaker ang mga napapanahong isyu sa ating bansa. Kaya naman "must see" ang "Neomanila". Aminado mas nagustuhan ko ang Neomanila kesa Birdshot. 




Sunday, October 29, 2017

FADING PARADISE (2017)


Si Bea Binene ay gumanap bilang Bea, isang vlogger at student filmmaker. Meron siyang YouTube page na "ParadisoGirl" kung saan nilalagay niya ang kanyang mga vlog (video blog) ng mga travels niya. Naisipan niyang bisitahin ang isang tagong isla sa Bicol na napuntahan niya at nang kanyang ina noong bata pa siya. Kaya naman hinikayat niya ang kanyang bestfriend na si Stacy (Krystal Reyes) at iba pang kaibigan (Coleen Perez at Mark Castillo) na pumunta sa isla. Pumayag at sumama sila. Sa pagpunta sa isla ay naging guide nila si Tonio (Kenneth Paul Cruz) na lumaki rin sa tagong islang iyon. Laking gulat nila ng mapuntahan ang isla dahil hindi na ito ang dating isla na kanilang napuntahan. Iba na ang hitsura nito dahil nasira na ang kalikasan sa mga nagkalat na basura. Ang masaklap nito ay pati ang mga naninirahan sa isla ay umaalis sa lugar at naghahanap ng ibang trabaho sa ibang lugar. Ano kaya ang gagawing hakbang ng ating bida sa kanyang nasaksihan?

Mula sa konsepto ni Bea Binene ang pelikulang "Fading Paradise". Aniya, na-inspire siyang gawin ang pelikula ng isang beses ay nag shoot siya ng programa sa isang isla at nakita niya ang other side na hindi ito maganda. Para sa kanya, ito ay advocacy niya sa climate change. Kaya naman ng ipresent niya din ito sa mga artistang kaibigan ay sinuportahan siya.

Okay. Maiintindihan natin na ito ay personal project ito ni Bea Binene pero hindi maiwasang may mapuna at mapansin ka sa pelikula. Ito ang mga ilan sa kapuna-puna at mapapansin sa pelikula:

> Parang episode ng "Maynila" ang pelikula na pwede mo ring isipin na movie made for TV o TV movie ang feels.

> Kung si Charo Santos ay pinaalala sa atin ang tono ng kanyang boses at paraan ng pagbasa ng mga liham sa "Maalala Mo Kaya" sa storytelling at pag-VO sa "Ang Babaeng Humayo", si Bea Binene naman sa "Fading Paradise" habang nagbabasa ng spiel sa vlog ng character niya ay parang din siyang nasa Public Affairs TV program na "Good News".

> Sa eksena kung saan pinakilala ni Tonio ang kapatid niya kay Bea. Tinatanong ni Bea ang kapatid ni Tonio. Ang sumasagot si Tonio. Akala namin pipi si kapatid. Yun pala nagsalita din siya nung huli. Laughable sa audience. Pati si lolo yung totoo? Anyare? Bakit hindi maayos ang dialogue?


Hindi naman kami nag-expect na makapanood ng educational o advocacy film o dokumentaryo tulad ng gawa ni Sari Dalena pero sana nakakakuha ng ideya ang filmmaker kung paano gumawa ng programa sa GMA Public Affairs kung saan si Bea ay naroon. Ang masaklap ay ilang beses na tayong nakakapanood ng ganitong kwento. Sana ay binago ang approach o istilo. Mismong ang mga millenial o kabataang nanonood na kasabay ko ay hindi interesado sa pinapanood.

Natuwa ako sa Q&A portion o interaction ng mga aktor sa millenials dahil nabigyan sila ng pagkakataon na mag-participate sa kung ano ang maaari nilang gawin upang protektahan ang kalikasan. Mas interesting na malaman kung ano ang nasa isipan ng mga millenials at icontribute nila at mas interesado sila sa mga artista. Nakakatuwa na handa naman ang mga artista sa Q&A. Kilig na kilig ang mga millenials kanila Bea Binene at Kenneth Paul Cruz.

BEST. PARTEE. EVER.


Si Miguel "Mikey" Ledesma (JC De Vera) ay isang socialite na may masamang bisyo. Gumagamit siya ng ipinagbabawal na gamot. Isang gabi habang nasa club siya ay inaresto siya ng pulis matapos niyang iabot ang droga sa isang kaibigan. Kaya naman nakulong siya. Sa kulungan ay nakilala niya si Marby (Aaron Rivera) na naging bestfriend niya. Nariyan din si Pitik (Jordan Herrera) na naging boyfriend niya. Si Nogi (Vince Rillon) ang serving nya o alalay. Si Attorney (Mercedes Cabral) na kanyang tagapagtanggol. Si Ramon Bong (Acey Aguilar) o mas kilala bilang "Boy Tulo" na may shady motive. 

Masasaksihan natin kung paano mag-cope with at mag-survive si Mikey sa kulungan at kung paano niya binago ang sistema ng isang grupo sa kulungan. Masasaksihan din natin ang sistema sa lipunan at hustisya sa bansa. 

Naiiba ang pagganap ni JC De Vera sa pelikulang ito sa mga previous roles nya sa TV. Kumbaga ay nakakapanibago pero nakakatuwa dahil opt to the challenge siya. Challenging ang role kaya nag-pay off naman ng manalo siyang Best Actor noong nakaraan taon sa QCinema. 

Aminado dragging ang pelikula dahil slow-paced ito taliwas sa title nito. May mga positive points naman ang pelikula. Tulad ng mga ss.:

> Naiiba siya sa mga prison movies na napapanood sa pelikula at TV. Sa una'y hindi maganda ang pag-welcome kay Mikey pero sa kalaunan ay na-earn niya ang respeto sa mga kapwa priso. Ang nakakatuwa sa karakter niya ay naging leader pa siya ng "gang-da", ang grupo ng mga bakla sa priso. Dahil dito ay nabigyan ng livelihood program ang mga beks tulad ng manipedi, parlor. Kahit pa galing siya sa affluent family ay hindi naman naging madamot ang karakter ni Mikey sa ibang preso. Naging tagapagtanggol siya ng ibang baklang preso at pinag-isa niya ang dalawang grupo ng mga baklang preso na madalas magkagulo.

> Marami ring tinalakay sa pelikula tulad ng mabagal na justice system, STD/HIV/AIDS kahit ang mga nagaganap sa kulungan like gang rape as initiation, gang wars din, palakasan system at marami pang iba na parang mash-up ang mga issues na ito sa isang pelikula. May eksena pa na dahil sa bagyo ay nadamay ang mga dossiers o legal documents kaya lalong bumagal ang takbo ng kaso.

May mga eksenang nagulat ako tulad ng habang nanonood ang mga guys ng porn kanya kanyang pwesto sila para mag-masturbate. Tapos yung isang beks kinuha ang opportunity para ma-blowjob yung dalawang kuya. Yung eksena din nila JC De Vera at Jordan Herrera ha ang lakas maka-Xavier Dolan.

Maaaring maihambing ang Best. Partee. Ever. sa pelikulang "Tarima" (2010) ni Fanny Serrano dahil hindi masyadong negative ang depiction sa kulungan. Sa palagay ko ay may konting element na kinuhang inspirasyon sa pelikulang "Midnight Express" (1978) ni Brad Davis. 


Wednesday, October 25, 2017

MGA GABING KASINGHABA NG HAIR KO (THOSE LONG-HAIRED NIGHTS, 2017)


Tatlong transgender women na ang trabaho ay masahista ang masasaksihan sa Burgos, red light district ng Maynila, na may kanya kanyang kwento sa buhay. Si Tuesday (Matt Daclan) ay hopeless romantic na umaasang makakakuha ng customer na hindi siya huhusgahan. Si Amanda/Armando (Anthony Falcon) naman ang streetsmart at family-oriented na transgender na inaasam pa din ang buhay sa probinsya kesa siyudad. At si Barbie (Rocky Salumbides) na kumakapit sa patalim upang kumita ng malaki. Nariyan din si Roger (Mon Confiado), ang nagsisilbing back-up o protektor nila sa oras ng panganib. Sa isang lugar na kung saan ay hindi masasabing ligtas at balitang napatay ang isa nilang transgender na kaibigan, magpapatuloy ba sila sa kanilang buhay sa gitna ng mga pangyayaring magaganap sa kanila sa isang gabi o mag-iiba ang kanilang pananaw sa buhay at babaguhin sila nito?

Mahusay na naipakita sa pelikula ang buhay ng mga transgender. Sila ay tao at maaaring kaibigan, kamag-anak, pamilya o kakilala mo na nakakasama mo sa araw-araw. Kahit bitin ang pelikula sa huli, para sa akin ay sapat na nailarawan ang buhay ng mga karakter. 

Sa tatlong aktor na gumanap na transgender, stand-out si Anthony Falcon bilang Amanda/Armando. Unrecognizable siya sa una. Binuhay niya ang karakter na halos siya na mismo ang karakter. Binigyan niya ito ng puso at personal touch na distinct sa ibang transgender portrayal. Hindi ko napanood ang nauna niyang pelikulang "Requieme". Nang mapanood ko ang pelikulang ito ay gusto kong mapanood ang Requieme dahil kay Anthony Falcon. Hinangaan ko siya ng mapanood ko ang "Anino sa Likod ng Buwan" lalong lalo na dito sa "Mga Gabing Kasinghaba ng Hair ko".

Mahusay din si Matt Daclan bilang Tuesday. Sa eksena kung saan na-pick up si Tuesday ng isang customer, makikita ang producer na si Bianca Balbuena tulad sa mga pelikulang "Engkwentro" at "Patay na si Hesus". In fairness, nalito ako ha. Magkahawig sina Matt Daclan na naka-cross dress at Bianca Balbuena. Going back sa performance ni Matt, convincing siya dahil kita mo sa kilos ng aktor sa kanyang pagganap ang pagiging flirtatious sa isang customer at ang pangangambang malaman ang kanyang sikreto ala-The Crying Game.

Si Rocky Salumbides ay umaanggulong Chin-Chin Gutierrez the transgender version. Ang karakter niyang si Barbie ay isa sa mga taong nakakasalamuha mo na maaaring kakilala mong ma-ambisyon na lahat ay gagawin sa ngalan ng salapi. 

Mahusay din si Mon Confiado bilang Roger na handa sa oras na tawagin siya para back-up sa kailangan ng tulong niya.

Sa end credits ng pelikula, mababasa ang "In loving memory of Jennifer Laude".



Tuesday, October 24, 2017

HIGH SCHOOL SCANDAL (Digitally Restored and Remastered Version)



Best cousins/best friends sina Rosselle (Gina Alajar) at Lyn (Sandy Andolong) na naghahanda sa huling taon nila sa high school.

Inggit na inggit si Rosselle sa kanyang pinsan dahil matagal nang magkasintahan sina Lyn at Bowie. Hindi nya napapansin na matagal ng may pagtingin sa kanya ang batchmate nyang si Alex. Ayaw na ayaw at iritang irita si Roselle kay Alex sa di malamang dahilan.

Sakto namang nakuha ni Rosselle ang gamit ni Steve Gonzales at itinago ito. Kaya naman ng hinanap ni Steve si Rosselle ay kinaibigan nya ito. 

Maaga namang nawala ang pagkabirhen ni Lyn matapos pagbigyan si Bowie sa birthday gift nito na makipagtalik sa kanya. Nang malaman ito ni Rosselle ay lalong nadagdagan ang kanyang curiosity, insecurity, frustration at inggit kay Lyn. Nagkaroon ng sexual fantasy si Rosselle kay Steve.

Kaya naman ng JS Prom ay umasa si Rosselle kay Steve. Hindi interesado si Steve sa dalaga. Kaya naman nagwalk-out si Rosselle matapos samahan ni Steve ang kanyang natitipuhan. Sinundan naman ni Alex si Rosselle. Pilit na nilalayo ng dalaga ang kanyang sarili sa binata pero dahil na rin sa curiosity, frustration at pagiging brokenhearted ni Rosselle sa nangyari sa kanila ni Steve ay nag-initiate itong akitin si Alex upang makipagtalik sa kanya. Hindi na nakapagpigil ang dalawa sa temptation kaya may nangyari sa kanila.

Samantala, sumama ang pakiramdam ni Rosselle habang nag-practice sa graduation kaya naman nagpa-check up siya. Dito ay nalaman niyang buntis siya.

Naisipan ni Rosselle na ipalaglag ang bata na makakaapekto sa kanyang buhay pati sa buhay nila Lyn, Bowie at Alex.

Na-banned ng censors ang pelikulang "High School Scandal" noong 1981 dahil na rin sa kontrobersyal na tema nito.

Matapang na tinalakay ng yumaong direktor na si Gil Portes ang mga isyu ng mga kabataan tulad ng pagiging mapusok, pre-marital sex, early pregnancy at abortion.

Dapat panoorin ng mga millenials ang pelikulang ito dahil kahit pa 80's ang setting nito ay hindi naiiba ang mga isyu ng mga kabataan noon at ngayon. Napatunayan ng pelikula na masyadong nag-roromanticize ang ilang mga kabataan na nagiging dahilan upang sila'y maging mapusok.

Nalulungkot ako sa tragic na character na si Rosselle. Nilunod siya ng kanyang insecurities at inggit. At hindi nya nakita ang maaaring maging tunay na intensyon sa kanya ni Alex. Lagi pang sinisisi si Alex sa nangyari kahit pa kasama si Rosselle sa pagkakamali.

Isa ang pelikulang "High School Scandal" na matapang na tinalakay ang abortion sa isang relihiyosong bansa. Sinundan ito ng ibang pelikula na tinalakay din ang abortion tulad sa Init sa Magdamag (1984) at ang hindi malilimutang pelikulang Hinugot sa Langit (1985).

Napapanahon at makabuluhan ang pelikulang "High School Scandal".

Monday, October 2, 2017

I LOVE YOU. THANK YOU. (2015/2017)


Si Paul (Joross Gamboa) at Ivan (CJ Reyes) ay magkababata na parehas nagtratrabaho sa Thailand. Nakilala ni Ivan si Red (Prince Estefan) dahi kay Paul. Nag-resign si Paul sa trabaho bilang guro dahil hindi niya ito passion. Sina Ivan at Red naman ay apat na taon ng nagsasama at mag-celebrate ng anniversary bilang mag-boyfriend. Si Red naman ay masaya sa pagiging bartender. Madalas siyang napapansin ng mga customers dahil charming at maganda ang pangangatawan niya. Lingid sa kaalamam niya na matagal na palang may lihim na pagtingin sa kanya si Paul. Nagdesisyon naman si Paul na magbakasyon sa Siem Reap, Cambodia dahil ito ang kanyang paboritong lugar na pasyalan at para makapag-isip isip din. Samantala, nanlalamig naman si Ivan kay Red. Habang namamasyal si Paul ay nakilala niya si Tang (Ae Pattawan), isang Thai gay porn writer. Sa kalasingan ni Paul sa bar ay inuwi siya ni Tang sa tinutuluyang bahay. Bigla na lang naglahong bula si Ivan sakto sa 4th anniversary nila ni Red. Kaya naman sa pagbalik ni Paul sa Thailand laking gulat niya ng maglaslas ng pulso si Red. Inamin din ni Paul na mahal niya sa Red ngunit patuloy pa rin siyang naghohold on sa kung ano ang meron sila ni Ivan lalo't wala silang closure. Naging malapit naman sina Paul at Tang sa muli nilang pagkikita. Nakahanap naman ng trabaho si Paul sa Ho Chi Minh, Vietnam bilang wedding coordinator. Lumalim naman ang relasyon nila Paul at Tang. Napagdesisyunan nilang maging mag-boyfriend. Sa hindi inaasahan, nagkita si Paul at Ivan. Si Tang naman ay patuloy na inalagaan ang kanyang lolong may Alzheimer's Disease. Sa pagtatagpo tagpo ng mga tauhang ito sino ang pipiliin ng isa't isa upang punan ang pagmamahal na hinahanap ng bawat isa?

Ang pelikulang "I Love You. Thank You." ay naglalarawan sa pagiging martir sa pag-ibig. May mga tauhang umasa, pinaasa, pinaghintay, naghintay, sinaktan at nasaktan. Mga kasangkapan na kapupulutan ng hugot na bentang benta sa millenial generation.

Ang napansin ko sa pelikula ay ang mga sumusunod:
1. Verbose na dialogues na parang nanonood ka ng isang stage play production o gay Woody Allen o gay Ingmar Bergman film. 
2. Kahit cheezy ang ilang mga dialogues, muli, sure benta ito sa mga millenials.
3. Sadya bang masokista ang mga karakter at mas pinili nilang masaktan na parang wala ng redeeming value na naganap.


Sa kabilang banda, may mga mahahalagang eksena sa pelikula tulad ng magkaroon ng trabaho si Paul sa Ho Chi Minh at na-appreciate ng kanyang amo ang trabaho nya. Kahit may low self-esteem si Paul ay nakatulong ang motivation ng amo nya para maniwala sa kanyang sarili. 

Maganda ang location ng pelikula. Bumabagay sa mala-soul searching journey ni Paul.

Napanood ko si Joross Gamboa dati na gumanap na bakla tulad ng cross-dresser role niya sa isang episode ng Maalala Mo Kaya kasama si TJ Trinidad. Dito sa pelikula ay isa siyang discreet na baklang may unrequited love sa karakter ni Prince Estefan. Napanindigan niya ang kanyang role. Aabangan ulit siya sa pelikulang "Deadma Walking" nila Edgar Allan Guzman.

Nakakatawa naman ang eksena bago matapos ang pelikula kung saan nagtakbuhan ang mga karakter sa paghahabol sa minamahal. Beshie ano to? My Bestfriend's Wedding? Buti na lang walang kasamang ulan. Hahaha. 

Gayunpaman, mas prefer ko pa din ang isang gay movie na sinulat ng filmmaker ang "Daybreak" nila Coco Martin at Paulo Rivero at ang kanyang dokumentaryong "Kung Giunsa Pagbuhat ang Bisayang Chopsuey".

Ang maganda naman sa mga likha ng filmmaker ay ipinapakita niya ang iba't ibang personalidad at karakter ng mga bakla.