HIGH SCHOOL SCANDAL (Digitally Restored and Remastered Version)

Best cousins/best friends sina Rosselle (Gina Alajar) at Lyn (Sandy Andolong) na naghahanda sa huling taon nila sa high school.

Inggit na inggit si Rosselle sa kanyang pinsan dahil matagal nang magkasintahan sina Lyn at Bowie. Hindi nya napapansin na matagal ng may pagtingin sa kanya ang batchmate nyang si Alex. Ayaw na ayaw at iritang irita si Roselle kay Alex sa di malamang dahilan.

Sakto namang nakuha ni Rosselle ang gamit ni Steve Gonzales at itinago ito. Kaya naman ng hinanap ni Steve si Rosselle ay kinaibigan nya ito. 

Maaga namang nawala ang pagkabirhen ni Lyn matapos pagbigyan si Bowie sa birthday gift nito na makipagtalik sa kanya. Nang malaman ito ni Rosselle ay lalong nadagdagan ang kanyang curiosity, insecurity, frustration at inggit kay Lyn. Nagkaroon ng sexual fantasy si Rosselle kay Steve.

Kaya naman ng JS Prom ay umasa si Rosselle kay Steve. Hindi interesado si Steve sa dalaga. Kaya naman nagwalk-out si Rosselle matapos samahan ni Steve ang kanyang natitipuhan. Sinundan naman ni Alex si Rosselle. Pilit na nilalayo ng dalaga ang kanyang sarili sa binata pero dahil na rin sa curiosity, frustration at pagiging brokenhearted ni Rosselle sa nangyari sa kanila ni Steve ay nag-initiate itong akitin si Alex upang makipagtalik sa kanya. Hindi na nakapagpigil ang dalawa sa temptation kaya may nangyari sa kanila.

Samantala, sumama ang pakiramdam ni Rosselle habang nag-practice sa graduation kaya naman nagpa-check up siya. Dito ay nalaman niyang buntis siya.

Naisipan ni Rosselle na ipalaglag ang bata na makakaapekto sa kanyang buhay pati sa buhay nila Lyn, Bowie at Alex.

Na-banned ng censors ang pelikulang "High School Scandal" noong 1981 dahil na rin sa kontrobersyal na tema nito.

Matapang na tinalakay ng yumaong direktor na si Gil Portes ang mga isyu ng mga kabataan tulad ng pagiging mapusok, pre-marital sex, early pregnancy at abortion.

Dapat panoorin ng mga millenials ang pelikulang ito dahil kahit pa 80's ang setting nito ay hindi naiiba ang mga isyu ng mga kabataan noon at ngayon. Napatunayan ng pelikula na masyadong nag-roromanticize ang ilang mga kabataan na nagiging dahilan upang sila'y maging mapusok.

Nalulungkot ako sa tragic na character na si Rosselle. Nilunod siya ng kanyang insecurities at inggit. At hindi nya nakita ang maaaring maging tunay na intensyon sa kanya ni Alex. Lagi pang sinisisi si Alex sa nangyari kahit pa kasama si Rosselle sa pagkakamali.

Isa ang pelikulang "High School Scandal" na matapang na tinalakay ang abortion sa isang relihiyosong bansa. Sinundan ito ng ibang pelikula na tinalakay din ang abortion tulad sa Init sa Magdamag (1984) at ang hindi malilimutang pelikulang Hinugot sa Langit (1985).

Napapanahon at makabuluhan ang pelikulang "High School Scandal".

I LOVE YOU. THANK YOU. (2015/2017)

Si Paul (Joross Gamboa) at Ivan (CJ Reyes) ay magkababata na parehas nagtratrabaho sa Thailand. Nakilala ni Ivan si Red (Prince Estefan) dahi kay Paul. Nag-resign si Paul sa trabaho bilang guro dahil hindi niya ito passion. Sina Ivan at Red naman ay apat na taon ng nagsasama at mag-celebrate ng anniversary bilang mag-boyfriend. Si Red naman ay masaya sa pagiging bartender. Madalas siyang napapansin ng mga customers dahil charming at maganda ang pangangatawan niya. Lingid sa kaalamam niya na matagal na palang may lihim na pagtingin sa kanya si Paul. Nagdesisyon naman si Paul na magbakasyon sa Siem Reap, Cambodia dahil ito ang kanyang paboritong lugar na pasyalan at para makapag-isip isip din. Samantala, nanlalamig naman si Ivan kay Red. Habang namamasyal si Paul ay nakilala niya si Tang (Ae Pattawan), isang Thai gay porn writer. Sa kalasingan ni Paul sa bar ay inuwi siya ni Tang sa tinutuluyang bahay. Bigla na lang naglahong bula si Ivan sakto sa 4th anniversary nila ni Red. Kaya naman sa pagbalik ni Paul sa Thailand laking gulat niya ng maglaslas ng pulso si Red. Inamin din ni Paul na mahal niya sa Red ngunit patuloy pa rin siyang naghohold on sa kung ano ang meron sila ni Ivan lalo't wala silang closure. Naging malapit naman sina Paul at Tang sa muli nilang pagkikita. Nakahanap naman ng trabaho si Paul sa Ho Chi Minh, Vietnam bilang wedding coordinator. Lumalim naman ang relasyon nila Paul at Tang. Napagdesisyunan nilang maging mag-boyfriend. Sa hindi inaasahan, nagkita si Paul at Ivan. Si Tang naman ay patuloy na inalagaan ang kanyang lolong may Alzheimer's Disease. Sa pagtatagpo tagpo ng mga tauhang ito sino ang pipiliin ng isa't isa upang punan ang pagmamahal na hinahanap ng bawat isa?

Ang pelikulang "I Love You. Thank You." ay naglalarawan sa pagiging martir sa pag-ibig. May mga tauhang umasa, pinaasa, pinaghintay, naghintay, sinaktan at nasaktan. Mga kasangkapan na kapupulutan ng hugot na bentang benta sa millenial generation.

Ang napansin ko sa pelikula ay ang mga sumusunod:

1. Verbose na dialogues na parang nanonood ka ng isang stage play production o gay Woody Allen o gay Ingmar Bergman film. 

2. Kahit cheezy ang ilang mga dialogues, muli, sure benta ito sa mga millenials.

3. Sadya bang masokista ang mga karakter at mas pinili nilang masaktan na parang wala ng redeeming value na naganap.

Sa kabilang banda, may mga mahahalagang eksena sa pelikula tulad ng magkaroon ng trabaho si Paul sa Ho Chi Minh at na-appreciate ng kanyang amo ang trabaho nya. Kahit may low self-esteem si Paul ay nakatulong ang motivation ng amo nya para maniwala sa kanyang sarili. 

Maganda ang location ng pelikula. Bumabagay sa mala-soul searching journey ni Paul.

Napanood ko si Joross Gamboa dati na gumanap na bakla tulad ng cross-dresser role niya sa isang episode ng Maalala Mo Kaya kasama si TJ Trinidad. Dito sa pelikula ay isa siyang discreet na baklang may unrequited love sa karakter ni Prince Estefan. Napanindigan niya ang kanyang role. Aabangan ulit siya sa pelikulang "Deadma Walking" nila Edgar Allan Guzman.

Nakakatawa naman ang eksena bago matapos ang pelikula kung saan nagtakbuhan ang mga karakter sa paghahabol sa minamahal. Beshie ano to? My Bestfriend's Wedding? Buti na lang walang kasamang ulan. Hahaha. 

Gayunpaman, mas prefer ko pa din ang isang gay movie na sinulat ng filmmaker ang "Daybreak" nila Coco Martin at Paulo Rivero at ang kanyang dokumentaryong "Kung Giunsa Pagbuhat ang Bisayang Chopsuey".

Ang maganda naman sa mga likha ng filmmaker ay ipinapakita niya ang iba't ibang personalidad at karakter ng mga bakla. 

ALAALA: A MARTIAL LAW SPECIAL

Sa paggunita ng ika-45 taon ng batas militar ng ideklara ni Ferdinand Marcos sa Pilipinas, inihandog ng GMA News and Public Affairs ang "Alaala: A Martial Law Special". Ito ay isang docu drama hango sa buhay ng kilalang manunulat at aktibistang si Bonifacio Ilagan. Si Ilagan rin ang sumulat ng script at ang award-winning na si Adolf B. Alix, Jr. ang direktor. Katuwang ni Alix sa pagdidirek si Rember Gelera.

Si Alden Richards ang gumanap bilang Bonifacio Ilagan. Si Ilagan ay chairman ng Kabataang Makabayan ng Diliman. Habang nagra-rally noong First Quarter Storm ay nakilala niya si Jose "Pete" Lacaba (Rocco Nacino). Si Lacaba ay sikat na manunulat na iniidolo ni Ilagan . Parehas ang paninindigan ni Lacaba at Ilagan na mapigilan ang pang-aabuso sa karapatang pantao. Kaya naman noong ideklara ni Marcos ang batas militar noong ika-21 ng Setyembre, 1972 ay sumali sa underground si Boni na sinundan din ni Pete.

Samantala, labis ang pag-aalala ng ina ni Boni na si Sara (Gina Alajar) sa mga ipinaglalaban ng kanyang anak. Namulat naman ang kapatid ni Boni na si Rizalina o Lina (Bianca Umali) sa mga pang-aabuso ng karapatang pantao. Malaki ang naging papel at impluwensiya ni Boni kay Lina kaya sumama din sa Kabataang Makabayan ang dalaga.

Nahuli sa isang raid ang magkaibigang Boni at Pete. Dito silang dalaw ay nakaranas ng matinding torture. Gumawa naman ng paraan si Sara upang makita ang anak. Dito ipinakita ni Boni ang bakas ng torture sa kanya. Sa sumunod na pagdalaw ni Sara kay Boni, nagpaalam naman sa kanya ang kapatid na si Lina dahil madedestino siya sa malayong lugar.

Nakalaya naman si Pete sa tulong ni Nick Joaquin ng tanggapin niya ang pagiging National Artist ngunit napatay naman ang kapatid niyang si Eman. Sa paglaya ni Boni, naging aktibo si Lina sa kilusan. Ito rin ang naging dahilan sa pagkawala ni Lina at mapabilang sa Desaparecidos.

Ang ilang bahagi ng docu-drama ay mga interviews kanila Boni Ilagan, Pete Lacaba, Adolf Alix Jr., Michael Pante, Dr. Jose Victor Torres, Nilda Lagman-Sevilla, Edita Burgos, JC Mijares-Gurango, Francisco Rodrigo Jr., Atty. Susan Villanueva, Alden Richards at Rocco Nacino. Ipinakita rin ang ilang behind-the-scenes at pre-production ng special.

Sa una'y aakalain mong miscast si Alden Richards subalit napakahusay niya sa kanyang pagganap. Isa ito sa mga challenging role na kanyang tinanggap. Isa rin ito sa hindi malilimutang pagganap ni Alden. Matatandaang gumanap si Alden Richards bilang Jose Rizal sa mini-series na "Ilustrado" ilang taon na ang nakakalipas. Natutuwa ako sa honesty niya ng makaharap niya si Boni Ilagan na wala siyang malawak na kaalaman sa Martial Law at magre-research siya bago ang shoot ng production. Makikita mo ang kanyang sinceridad at dedikasyon bilang aktor na maganda ang kinalabasan ng kanyang portrayal. Pinaghandaan at pinag-aralan nya ang kanyang role. Maaari na naman siyang maging nominado at manalo bilang Best Actor dito.

Magaling rin si Rocco Nacino bilang Pete Lacaba. Isa ito sa hindi malilimutang pagganap ng aktor matapos ang kanyang pagganap sa "Ang Sayaw ng Dalawang Kaliwang Paa" bilang isang mananayaw na may lihim na pagtingin sa kanyang kaklase na kapwa niya lalaki, mini-series "Bayan Ko" bilang isang may integridad na alkalde, "Burgos" bilang Jonas Burgos, anak ni Edita Burgos, isang desaparecidos at "Bar Boys" bilang happy-go-lucky law student na pumasok sa fraternity. Second cousin ng ina ni Rocco si Pete Lacaba.

Maasahan natin ang husay sa pagganap ni Ms. Gina Alajar bilang Sara, ina ni Boni, na gagawin ang lahat para sa anak. Nakakaiyak ang eksena kung saan kausap niya si Lina at sinabing, "hindi ako iiyak, hindi ako maghihinagpis" habang pinipigilan ang kanyang pag-iyak.

Magaling din si Cedrick Juan bilang Abe, kasamahan nila Boni at Pete sa underground. Kahit sa maikling oras ay dama mo ang pagiging sanse ni Angelina "Mailes" Kanapi.

Naiiba naman ang pagganap ni Bianca Umali bilang Lina. Hindi siya pa-tweetums dito bagkus ipinakita niya rito na kaya niyang gampanan ang isang soft-spoken na karakter ngunit matatag.

Mahusay ang direksyon at script ng docu drama. Magaling ang paggamit ng musika at tunog dahil ramdam ang tensyon noong panahon ng diktadurya.

Nakakakilabot ang torture scene lalo na sa eksenang ipinasok sa ari ni Boni ang isang bahagi ng hibla nang walis tingting maski ang pananakot sa kanya at kay Pete.

Noong college days ko, nagkaroon ng one day  free scriptwriting workshop sa UP sabi si Ricky Lee daw. Pagdating namin sa UP, hindi si Ricky Lee kundi si Bonifacio Ilagan ang naabutan namin. Hindi naman ako nagsisi dahil may natutunan ako sa kanya. May kaibahan din sa paniniwala sa pagsulat ng script ang dalawa. Naikwento nya na sumama sa underground movement siya, si Ricky Lee at si Pete Lacaba. At ang isang indie film na sinulat nya ang pamagat ay "Sigwa" (2010) na pinagbibidahan nila Lovi Poe, Dawn Zulueta at Zsa Zsa Padilla.

Si Jose "Pete" Lacaba naman ay isang batikang manunulat at aktibista noong batas militar. Kinikilala ang kanyang galing sa pagsulat ng script tulad sa mga pelikulang "Bayan Ko: Kapit sa Patalim" (1985) na pinagbibidahan nila Gina Alajar at Philip Salvador sa direksyon ni Lino Brocka, Sister Stella L. (1984) kasama si Vilma Santos sa direksyon ni Mike De Leon, Orapronobis (1989) at Jaguar (1979) mga pelikulang dinirek ni Lino Brocka at Segurista (1996) sa direksyon ni Tikoy Aguiluz.
Sa docu drama ni Sari Dalena na "Dahling Nick" (2015) tinalakay din ang pagpapalaya kay Pete Lacaba nang tanggapin ni Nick Joaquin ang pagiging National Artist.

May mga ilang political films akong napanood na ipinakita ang buhay noong batas militar tulad ng mga sumusunod: "Bayan Ko: Kapit sa Patalim" at "Sister Stella L." na isinulat ni Pete Lacaba, "Dekada '70" (2002) hango sa nobela ni Lualhati Bautista, "Eskapo" (1995), "Gumapang Ka sa Lusak" (1990) kung saan gumanap si Charo Santos bilang mala-Imelda Marcos na asawa ng tiwaling alkalde. Naging inspirasyon din ang kwento ng martial sa mini-series na "A Dangerous Life" noong 80's kasama sina Gary Busey, Dina Bonnevie, Tessie Tomas bilang Imelda Marcos, Ruben Rustia bilang Ferdinand Marcos at Laurice Guillen bilang Corazon Aquino. Ilan lamang ito sa mga pelikulang makakapagbigay sa manonood ng kaalaman noong martial law.

Ang kaibahan ng "Alaala" ay nirereach out nito ang millenial generations upang maging mulat sa mga nangyari sa batas militar na naging bahagi ng kasaysayan ng Pilipino. Maganda rin ang naging resulta ng matinding pananaliksik ng docu drama dahil nagbibigay din ito ng impormasyon patungkol sa ibang kalagayan noong martial law.

Kung makakagawa ulit ng ganitong produksyon ang GMA, maaari na uling gumawa ng mga critically-acclaimed na pelikula ang GMA Films tulad ng Sa Pusod ng Dagat (1998), Jose Rizal (1998), Muro-Ami (1999), Saranggola (1999) at Deathrow (2000).

Tunay na maipagmamalaki ng GMA News and Public Affairs ang "Alaala: A Martial Law Special".

BAR BOYS (2017)

Isa sa mga pelikulang kalahok sa Pista ng Pelikulang Pilipino ang BAR BOYS. Mapapansing 2016 pa lamang ay nailabas na ang trailer nito.

Ang Bar Boys ay patungkol sa apat na magkakaibigang lalaking nangarap na makapasok sa law school. Sa apat na magbarkada, tatlo ang nakapasa. Sina Eric (Carlo Aquino), Torran (Rocco Nacino) at Chris (Enzo Pineda). Sa kasamaang palad, hindi nakapasa si Josh (Kean Cipriano). Makikita sa pelikula ang proseso ng tatlong karakter kung paano nila nalagpasan ang mga pagsubok at paano sila naging matagumpay sa law school.

Para sa akin, interesting ang characters sa pelikula tulad ni Eric na ginampanan ni Carlo Aquino. Sa grupo, si Eric ang mahirap ngunit matiyaga at masipag mag-aral dahil alam nya ang kanyang kahinaan na hindi siya ganoong katalino at isinasaalang alang niya na iginagapang ng kanyang ama na isang security guard ang kanyang pag-aaral sa law school. Magaling si Carlo Aquino dito at yumminess siya (hala! Ano to). Extension ng yummyness sa TV series na I Will Survive.

Si Enzo Pineda ay gumanap bilang Chris. Ang eloquent at grade conscious sa kanilang magkakaibigan dahil na rin sa gusto niyang patunayan sa kanyang daddy na kaya niyang mag-excel sa law school sa Pilipinas. Mas gusto kasi ng kanyang daddy na subukan niyang mag-aral ng law school sa Harvard. Kaya may kondisyon ang kanyang dad para mag-stay siya sa Pinas yun ay hiwalayan ang kanyang girlfriend na si Rachel (Anna Luna). Napansin ko ang gwapo masyado ni Enzo dito at yummyness din siya dito (hala!) saka I believe big break nya ang pelikulang ito. I also believe na greatest performance ni Enzo ang pagganap niya sa Bar Boys. Magaling din si Anna Luna dito as girlfriend nya.

Si Rocco Nacino naman ay si Torran, ang happy-go-lucky sa barkada. Supportive sa kanya ang nanay niya na ginampanan naman ni Mailes Kanapi. Sa kalagitnaan ng pelikula, sumali siya sa fraternity para magkaroon ng koneksyon. Isa na naman ito sa hindi niya malilimutang pelikula matapos "Ang Sayaw ng Dalawang Kaliwang Paa." 

Maraming supporting actors at characters ang nakakatuwa na mapanood tulad ni Atty. Victor Cruz (Sebastian Castro) na noong una inakala nilang classmate nila na nakasuot ng polo na may design na maraming saging at nakatingin kay Eric. 

Nakakatuwa yung eksena na pumunta si Eric sa office ni Atty. Cruz. Take note: naka-boxers si Eric. (Kailangan ba talagang naka-boxers ang lalaki para mang-akit? At kailangan sa pagpasok ng office talaga? Buti di siya nasita ng guard. Sana napanood ni kneejerk kneecritic ang pelikula. Gusto ko malaman reaksyon nya sa eksenang ito. Hahaha.) In fairness, sa chemistry ni Carlo at Sebastian ha... panalo!

Kahit sa maiksing oras, natuwa din ako kay Hazel Faith Dela Cruz na classmate nila Torran na naka-one night stand niya. May future si ate sa acting career nya. Napanood ko siya sa "Ang Kababaihan ng Malolos" at "4 Days". Nagalingan ako sa kanya sa "Ang Kababaihan ng Malolos"' Nag-request pa siya ng round 2 ha. All the best kay ate mag-round 2 at level up ang career at exposure niya sa mga future projects niya. 

Siyempre, maasahan na natin si Odette Khan bilang intimidating, strikto, terror ngunit may pusong professor sa kanilang huling term sa law school. Balanse ang atake ni Ms. Odette Khan mula sa terror professor hanggang sa maging sympathetic siya sa character ni Carlo Aquino. Nakakaloka yung eksenang tinanong niya si Carlo at ang sinagot ng binata, "I think". Bigla siyang pinutol ni Odette at sinabing, "That's what you think!" Sinermunan siya na dapat accurate siya at ang opinyon niya ay hindi makakatulong. Dapat siyang maging nominado bilang Best Supporting Actress sa iba't ibang award-giving bodies.

Si Vince Larena na gumanap na Lord Master ng fraternity ay magaling din. Menacing ang portrayal niya sa pelikula. Ramdam din ang pagiging terror professor ni direk Emmanuel Dela Cruz sa isang eksena kung saan ay tinanong niya ang ninerbyos, napaiyak at napa-walk out na babaeng estudyante.

Natuwa ako kay Mailes Kanapi sa pelikulang ito. Lalo na yung part na excited siyang salubungin si Rocco Nacino para malaman ang result ng bar exam. Kakaiba siya dito sa mga nauna niyang pelikula tulad ng Zombadings at Patay na si Hesus.

Nalulungkot ako sa karakter ni Kean Cipriano na si Josh dahil hindi siya binigyan ng maayos na story arc o character development. Agree ako kay Present Confusion o devasishanti sa point nya. Pwede naman na tanggalin ang character niya dahil kaya na nang tatlong lead characters na buhayin ang kwento o di kaya gawan siya ng subplot na pwedeng suporta o magrepresent ng maayos na proseso sa buhay niya kahit di siya nakapasa sa law school. 

Trivia: Sa orientation at introductory scene sa law school, hindi dapat si Ms. Maey Bautista ang magbibigay ng opening remarks. Ang eksenang ito ay para kay Odette Khan ngunit may sakit si Ms. Odette sa araw na gagawin na niya ang eksena kaya pinasinalo ito kay Ms. Maey.

Hindi man ako nag-aral sa law school pero sa panonood ko ng pelikula ay naramdaman ko ang pressure sa law school. 

4 DAYS

August 24 nang magkaroon ng screening ang pelikulang "4 Days" sa UP Cine Adarna. Unang ipinalabas ang pelikula sa Cinemalaya noong 2016.

Sina Mark (Mikoy Morales) at Derek (Sebastian Castro) ay roommates na nagkaroon ng malalim na relasyon. Makikita ang development ng kanilang relasyon in a span of 4 Valentine's Day. 

Tulad sa mga naunang pelikula ni Adolf Alix, Jr. na "Daybreak" at "Muli", tinalakay ng pelikula ang same-sex romantic relationships. Tahimik at slow-paced din ang pelikula. Hindi din masyadong gumamit ng musika at tunog ang pelikula. Mas binigyang diin nito ang mga galaw at kilos (movements, mannerisms at gestures) ng mga tauhan. Makikita ito sa mga pagsulyap at mga bagay na hindi masabi ng dalawang karakter. Mararamdaman mo din ang melancholia ng dalawang tauhan sa pelikula dahil minimal ang dialogues. Ang kaibahan ng pelikulang ito sa naunang dalawang gay movies ni Alix ay implied ang sex scene nila Mark at Derek.

Hindi na bago kay Mikoy Morales ang pagganap ng gay roles. Mapapanood na siyang gumaganap ng gay roles sa TV series na Pepito Manaloto at D'Originals. Kakaiba ang atake ni Mikoy Morales sa karakter nya dito. Tahimik ngunit sa confrontation scene nila Sebastian Castro ay nakita natin ang puso ng kanyang karakter. Kaya naman hindi na kataka-takang nag-number 9 ang performance niya sa episode ng “Ang Pinaka: Fabulous Papa Turned Mama”. Habang pinapanood ko siya ay nakikita ko sa kanya si Ruru Madrid. Hehehe.

Base sa trivia na binigay ng filmmaker at actors, 2 araw lamang ginawa ang pelikula. May switching of roles sina Mikoy at Sebastian na parang nangyari kanila William Hurt at Raul Julia sa pelikulang "Kiss of the Spider Woman". Ang nakakatuwa mas pinili ni Sebastian ang straight then later bisexual na si Derek. Napanindigan naman niya role sa pelikula.

Nakakatuwang malaman na collaboration nila Sebastian Castro, Adolf Alix Jr. at Mikoy Morales ang istorya. Base rin sa trivia ni direk Adolf, wala silang draft script kundi outline lamang habang ginagawa ang pelikula.

Nakakatuwa ding malaman na distributor ng pelikulang 4 Days ang TLA releasing.

Scene stealer din si Rosanna Roces bilang nanay ni Derek at nakadagdag sa emotional mood ng pelikula ang kanta ni Mikoy Morales na “Pusong Hindi Makatulog”.

Ipinakita din ang trailer ng pelikulang "Madilim ang Gabi" na ipapalabas sa Toronto International Film Festival kung saan pagbibidahan ito nila Gina Alajar at Philip Salvador at "Urban Legends" kung saan ang bida naman ay sina Nora Aunor, Martin Del Rosario at Sebastian Castro.

PATAY NA SI HESUS at Muling Pagkabuhay ng dekalidad na comedy ng pelikulang Pilipino

Isa sa mga pelikulang kasama sa Pista ng Pelikulang Pilipino ang "Patay na si Hesus". Una itong naging kalahok sa 2nd QCinema noong 2016.

Nabalitaan ng single mother na si Iyay/Maria Fatima (Jaclyn Jose) na namatay na ang kanyang estranged husband na si Hesus. Nagdesisyon siyang isama ang kanyang mga anak upang bumiyahe mula Cebu hanggang Dumaguete para makipaglamay sa burol ni Hesus. Ayaw sumama ng dalawa niyang anak na sina Jude o Judith Marie (Chai Fonacier) na isang transman at underachiever na anak niyang si Jay (Melde Montanez) na unemployed at maka-ilang beses ng bumagsak sa board exam at patuloy pa ring umaasang makakapasa pa. Si Bert (Vincent Viado) lang ang gustong sumama kay Iyay habang bitbit ang alagang asong si Hudas (Sadie). Hindi payag si Iyaya na hindi sumama sina Jude at Jay kaya naman siya na ang nagdesisyong magmaneho ng kanilang van. Dadaanan din nila sa isang kumbento ang madreng hipag ni Iyay na si Lucy (Angelina "Mailes" Kanapi). Sa kanilang paglalakbay ay marami silang makikilala at mapagdadaanan at unti-unti itong magbubukas sa komunikasyon sa isang dysfunctional family hindi lamang upang masabing nakipaglamay sila sa burol ng ama bagkus ito ay para mas mapalapit ang isa't isa at mapagtibay ang samahan ng pamilya.  

Matagal na din akong nakakapanood ng road movies. Ilan lamang ang mga sumusunod na road movies: Two For the Road (1967) kasama sina Albert Finney at Audrey Hepburn, Thelma and Louise (1991) kasama sina Geena Davis at Susan Sarandon, Little Miss Sunshine (2006) kasama sina Steve Carell, Toni Collette, Greg Kinnear, Abegail Breslin at Paul Dano kahit ang pelikulang "Biyaheng Lupa" ni Armando Lao at "Langit sa Piling Mo" ni Eric Quizon. 

Naiiba naman ang road movie na "Patay na si Hesus" sa pelikulang Pilipino. Surprising na nakakatawa ang pelikula. Grabe ang tawa naming ng bestfriend ko habang pinapanood ang pelikula. Patay na si Hesus is very witty, outrageously and wickedly funny. May bahagi ang pelikula na somewhat may "Little Miss Sunshine" feels lalo't tungkol ito sa isang dysfunctional family at merong namatay na karakter. 

Chai Fonacier is magnificent. Labis ang aking paghanga sa aktres na si Chai Fonacier bilang Jude o Judith Marie. Nabigyan nya ng puso ang isang transman na naghahanap ng kalinga at pagmamahal at umaasang maibabalik sa kanya ang pagmamahal ng kanyang girlfriend dahil na rin sa itinuring na niyang para itong anak. Jaclyn Jose is astonishing. Napahanga rin ako ni Jaclyn Jose bilang Iyay o Fatima Marie dahil naiiba rin ang pagganap niya dito. Ewan ko ba kung bakit na-convince niya ako sa pagiging Bisaya niya. Talagang pinag-aralan niya ang paggamit ng Bisayang lengwahe. Isa ito sa mga dramedy roles nya na hindi ko makakalimutan tulad na lamang sa kanyang teleserye na “Mundo Mo’y Akin”. Subtle at hindi pilit magpatawa gaya na lamang ng kanyang co-actors. Natutuwa din ako kay Melde Montanez dahil effortless din ang pagpapatawa niya. Natural na natural. Ang pagganap ni Angelina Kanapi sa pelikulang ito ay parang extension ng kanyang role sa “Zombadings: Patayin sa Shokot si Remington.” Hahaha. Ang karakter naman ni Vincent Viado ang nagbigay ng konsensya sa kanyang pamilyang naguguluhan sa current situation nila sa buhay.

Mahusay ang paggawa ng script at execution ng direction dahil hindi ito pilit magpatawa at pinapakita ang normal na conversation at pinagdadaanan ng isang dysfunctional family. Magaling ang character development sa pelikula na makikita mo habang pinapanood ang bawat miyembro ng pamilya ni Iyay mula simula hanggang huli.

Maraming nakakatawang moments ang pelikula na ayokong masyadong maging spoiler. Mag-share ako ng konti. Mapapansin sa pelikula ang contrasting na pangyayari o masasabi mong irony tulad na lamang sa burol at libing ni Hesus kung saan may nagpropose ng kasal sa burol at ang mah-jong na naging lego. Sa eksenang namatay ang asong si Hudas, nakaputi ang mga nakikiburol sa pagkamatay ni Hesus samantalang nakaitim ang pamilya nila Iyay at mas iniyakan nila ang pagkamatay ng aso kesa Hesus. Nagpapakita lamang na mas meron pang relasyon o koneksyon ang pamilya nila Iyay sa hayop kesa sa ama nilang namatay. Kahit sa pangalan ni Hesus at Hudas ay makikita mo ang contrast o irony. 

One helluva ride ang Patay na si Hesus. Hindi ko pinagsisihang panoorin ang pelikulang ito.

RESPETO (2017): Ang pelikulang karapat-dapat na i-respeto

Isa sa mga pelikulang kalahok sa Cinemalaya 2017 ang "Respeto". Mula sa direksyon ni Alberto Treb Monteras II at panulat nina Treb Monteras at Njel De Mesa.

Si Hendrix (Abra) ay isang kabataang maagang namulat sa karahasan at kahirapan sa kanilang lugar sa Pandacan. Pangarap niyang maging sikat na freestyle rapper o sa flip top tulad ni Jogard Bayagbag o mas kilala sa tawag na Breezy G. (Loonie)

Dahil na rin sa hirap ng buhay at pakikisama sa kinakasama ng ate Connie (Thea Yrastorza) niyang si Mando (Brian Arda) ay napipilitang magbenta ng droga si Hendrix. 

Sa kagustuhang mapasabak sa pagtatangka niyang sumubok sa flip top at mapansin ng kanyang hinahangaang si Candy (Kate Alejandrino) ay nagamit nya ang pera ni Mando. Sa kasamaang palad ay natalo siya at napagalitan at nasaktan pa ni Mando. Kaya naman naisipan niyang pasukin ang bahay ni Doc (Dido Dela Paz), isang retiradong makata. Tinulungan si Hendrix ng kanyang mga kaibigang sina Betchai (Chai Fonacier) at Payaso (Yves Bagadiong).

Nabigo silang tatlo ng mahuli ang tatlo ni Doc ngunit imbes na hayaang maparusahan ang tatlo ay hiniling na lang niya na ayusin ang kanyang bookshelves.

Natuklasan ng tatlo ang mga likha ni Doc na gusto niyang ibaon sa limot. Unti-unti ring nagkakasundo sina Doc at Hendrix pati ang kaibigan ni Hendrix.

Hindi makapaniwala si Doc dahil ang mga itinabi niyang likha ay ginamit ni Hendrix para sa isang gabi ng showdown ng flip top. Kaya sumugod si Doc sa event at sinabihang "huwad na makata" at "hindi lamang magnanakaw ng gamit. Magnanakaw din ng ideya" si Hendrix.

Hindi ito naging dahilan para magalit at tuluyang lubayan ni Doc si Hendrix.  

Samantala, hindi makasundo ni Doc ang kanyang anak na pulis (Nor Domingo). Hindi rin gusto ng anak nya na mamalagi siya sa lumang bahay na punong puno ng mapait na alaala. Walang kamalay malay si Doc na kasabwat ang anak niya sa pagbebenta ng ilegal na droga.

Hindi naman makapaniwala si Hendrix na ang aabutan niya ng drogang ipinapahatid sa kanya ay si Breezy G. At magiging witness siya sa isang masaklap na pangyayari ang i-gang rape si Candy.

Dito lalong nagkaroon ng koneksyon si Doc at Hendrix dahil si Doc ay may parehong karanasan ng kanyang pamilya noong panahon ng diktadurya.

Sa kaarawan ni Hendrix, isang kagimbal gimbal na pangyayari ang masasaksihan ni Hendrix na maski siya ay magiging bahagi nito.

Pinaghalong tradisyunal at makabago ang paraan upang i-reach out ang mga millenials na manonood. Ang ganitong paraan ay itinuturing na instrumento o daan upang maging komunikasyon sa pamamagitan ng mga berso at tula. 

Malaki man ang impluwensiya ng mga Hollywood films tulad ng 8 Mile (2000) at mga likha ni Spike Lee na maaaring naging reference ng pelikula. Fresh ang take sa konsepto ng pelikula lalo't bihira kang makapanood ng ganito sa pelikulang Pilipino.

Hindi siya basta poverty porn film. Napapanahon ang mga isyung tinalakay sa pelikula. Maraming sosyopolitikal at sosyoekonomika ang mga tinalakay sa pelikula. Nariyan ang kalagayan sa lipunan, kahirapan, prostitusyon at pagbabago sa uri ng panitikan. Natalakay din ang extrajudicial killings na una kong napanood sa "Engkwentro" ni Pepe Diokno. Sa demolition scene ng pelikula pinaalala sa akin nito ang isang parehong eksena sa pelikulang "Ataul for Rent" ngunit mas matapang na inilarawan ang demolition scene sa pelikulang ito.

Mahusay ang pagkakaganap ni Dido Dela Paz bilang Doc. Sumasalamin siya sa isang henerasyon na pilit nililimot ang pait ng kasaysayan. Ang relasyon nila Doc at Hendrix ay sumisimbolo sa generation gap. Challenging sa part nila Abra at Loonie ang gumanap sa kanilang papel dahil hindi mo alan kung paano sila huhugot ng emosyon subalit napanindigan naman nila ang kanilang papel. Mas lalong mapanghamon sa part ni Abra ang pagganap bilang troubled na kabataang nangangarap na maging rapper at sumikat sa larangan ng flip top. Magaling din si Nor Domingo bilang anak na pulis ni Doc. Si Nor Domingo ang gumanap na kanang kamay sa karakter ni Nonie Buencamino sa TV series na "The Greatest Love" at nagsilbi ring Lighting Director ng show

Humanga ako kay Chai Fonacier. Dumagdag muli sa kanyang filmography ang pelikulang ito. Naalala ko siya sa pelikulang "Pauwi Na". Kaya naman aabangan ko siya sa "Patay na si Hesus" dahil hindi ko ito napanood nung QCinema 2016. Naalala ko kay Chai Fonacier si Taraji P. Henson hindi sa kanyang hitsura kundi sa galing sa pag-arte. Isa siya sa pakakaabangan na indie actress na maaaring ihanay kanila Angeli Bayani, Mercedes Cabral, Irma Adlawan at Sue Prado.

Kahit maikli ramdam mo ang sakit sa nangyari sa karakter na Candy ni Kate Alejandrino. Siya rin ang gumanap na ex-girlfriend sa lesbian karakter ni Jasmine Curtis-Smith sa pelikulang "Baka Bukas".

Mahusay ang execution ng pelikula kahit ang script nito. Magaling rin ang musika dahil ito ay nilapat ni Jay Durias. Maski ang teknikal na aspeto tulad ng ilaw at tunog ay umakma sa pelikula.

Karapat-dapat lamang na i-respeto ang pelikulang "Respeto".